മാന്ത്രികവിദ്യയെ വെല്ലുന്ന കൈയടക്കവും മനസ്സാന്നിധ്യവും കൊണ്ട് മാസ്മരിക ചിത്രങ്ങള്‍ തീര്‍ത്ത് ആസ്വാദക ലക്ഷങ്ങളുടെ ഹൃദയം കീഴടക്കിയ മഖ്ബൂല്‍ ഫിദാ ഹുസൈന്‍ ചിത്രീകരിക്കാത്ത വിഷയങ്ങള്‍ അത്യപൂര്‍വം; ഓടിക്കയറാത്ത ഉയരങ്ങളും. 1957ല്‍ തന്റെ കലാസൃഷ്ടികളുടെ പ്രദര്‍ശനം ആദ്യമായി മുംബൈയില്‍ സംഘടിപ്പിച്ചത് തൊട്ട് പത്മശ്രീ മുതല്‍ പത്മവിഭൂഷണ്‍ വരെയുള്ള പരമോന്നത ബഹുമതികളുടെ പടവുകള്‍ ഒന്നൊന്നായി ചവിട്ടിയ ഈ 'ഇന്ത്യന്‍ പിക്കാസോ' കോറിയിട്ട ചിത്രങ്ങളുടെ അമൂല്യ ശേഖരത്തിന് കോടികളാണ് ഇന്ന് അന്താരാഷ്്ട്ര വേദിയില്‍ മോഹവില എന്നതില്‍നിന്ന് മനസ്സിലാക്കാം, ലോകം ആ വലിയ മനുഷ്യനെ എങ്ങനെ നോക്കിക്കാണുന്നുവെന്ന്. 2008ല്‍ നടന്ന അന്താരാഷ്ട്ര വില്‍പന മേളയില്‍ 16 ലക്ഷം അമേരിക്കന്‍ ഡോളറിനാണ് ഒരു ചിത്രം (ബാറ്റില്‍ ഓഫ് ഗംഗ ആന്‍ഡ് യമുന: മഹാഭാരത 12) വില്‍പനയായത് എന്നത് മുക്കാല്‍ ദശകത്തിലേറെകാലം തിളങ്ങിനിന്ന കലാജീവിതത്തിന് സ്വര്‍ണപ്പതക്കമണിയിക്കുന്നു. സംഭവ ലോകത്തും ഭാവനാ വിലാസത്തിലും ഒരു പോലെ പതിവു ശീലങ്ങളുടെ ഒറ്റയടിപ്പാതയില്‍ ഉറച്ചുനില്‍ക്കാന്‍ മനസ്സു വരാതിരുന്ന കാരണങ്ങളാല്‍ തന്നെയാണ് ഫ്രാന്‍സീസ് ന്യൂട്ടന്‍ സൂസ 1947ല്‍ രൂപവത്കരിച്ച പ്രോഗ്രസീവ് ആര്‍ട്ടിസ്റ്റ്‌സ് ഗ്രൂപ്പില്‍ ഹുസൈന്‍ അംഗമാകുന്നത്. തന്റെ ഉള്ളില്‍ പണ്ടു മുതല്‍ക്കേ പതഞ്ഞു പൊന്തുന്ന വേറിട്ട വഴിയെക്കുറിച്ച അന്വേഷണത്തിന്റെ ഒരു ചുവടുവെപ്പായി ഈ സംഭവത്തെ വിലയിരുത്താം. കാരണം ബംഗാള്‍ സ്‌കൂള്‍ ഓഫ് ആര്‍ട്‌സ് സ്ഥാപിച്ച ദേശീയ പരമ്പരാഗത കലാസങ്കല്‍പങ്ങളുടെ പുറംതോട് പൊട്ടിച്ചെറിയുകയായിരുന്നു പ്രോഗ്രസീവ് ഗ്രൂപ്പിന്റെ ലക്ഷ്യങ്ങളിലൊന്ന്. കടലാസില്‍ കോറിയിടുന്ന ചിത്രങ്ങളില്‍ മാത്രമല്ല, വെള്ളിത്തിരയില്‍ 'ജീവന്‍ വെക്കുന്ന' ദൃശ്യ രൂപങ്ങളുടെ സൃഷ്ടിയിലും കമ്പവും കഴിവും ഉള്ള കലാകാരനായിരുന്നു താനെന്ന് 'ത്രൂ ദ ഐയ്‌സ് ഓഫ് എ പെയ്്ന്റര്‍' സാക്ഷ്യപ്പെടുത്തുന്നു. 1967ല്‍ ഹുസൈന്‍ സംവിധാനം ചെയ്ത ഈ ചിത്രം ബെര്‍ലിന്‍ അന്താരാഷ്ട്ര ചലച്ചിത്രമേളയില്‍ സ്വര്‍ണപ്പതക്കമണിയുകയുണ്ടായി. അങ്ങനെ അംഗീകാരത്തിന്റെ ചില്ലു മേടയിലിരുന്ന് ആസ്വാദകവൃന്ദത്തിന് നേരെ കൈകൂപ്പി നില്‍ക്കുകയായിരുന്ന ഈ ഇന്ത്യന്‍ താരത്തിനുനേരെ വിമര്‍ശനങ്ങളുടെ കല്ലേറു നടത്താനും നാട്ടുകാരില്‍ ഒരു വിഭാഗം ഊണും ഉറക്കവുമൊഴിച്ചു കാത്തിരുന്നു വെന്നത് വിധിവൈപരീത്യമായിരിക്കാം. ഭാരതമാതാവിനെയും ദേവതകളെയും നഗ്‌നമായി ചിത്രീകരിച്ചു എന്ന ആരോപണം ഉയര്‍ത്തി ഹൈന്ദവ വര്‍ഗീയവാദികള്‍ കേസു കെട്ടുകള്‍ കൊണ്ട് അടക്കിയിരുത്താന്‍ മാത്രമല്ല അപ്പാടെ ഇല്ലാതാക്കാനും നടത്തിയ നെറികെട്ട നീക്കത്തിന്റെ പാടുകള്‍ മറയും മുമ്പെ ഈ മനീഷി ഭൗതിക ലോകത്തിനുമപ്പുറത്തേക്ക് നടന്നകലുമ്പോള്‍ ഇന്ത്യക്ക് ഇരട്ട ദുഃഖത്തിന്റെ കണ്ണീര്‍ കാലവര്‍ഷം. ജനിച്ച നാട്ടിനെയും നാട്ടുകാരെയും ഒരിക്കല്‍കൂടി കാണാനുള്ള അന്ത്യാഭിലാഷം പൂര്‍ത്തിയാകാതെയാണ് എന്നും ഇന്ത്യക്കാരനായി അറിയപ്പെടുന്നതില്‍ അഭിമാനം കൊണ്ടിരുന്ന ഈ വിശ്വവിഖ്യാത പ്രതിഭാധനന്‍ അങ്ങകലെ ലണ്ടനില്‍ വിടചൊല്ലിയതെന്ന അനുഭവം ഇന്ത്യക്ക് നാണക്കേടുണ്ടാക്കുന്നതാണ്; അതിലേറെ വിട്ടുമാറാത്ത മനസ്സാക്ഷിക്കുത്തും. തനിക്കെതിരെ ഫാസിസ്റ്റ് പ്രതിലോമ ശക്തികള്‍ കെട്ടിച്ചമച്ച കേസുകളത്രയും കോടതികള്‍ ചെലവുസഹിതം തള്ളിയിട്ടും മാതൃരാജ്യത്ത് കാലുകുത്താന്‍ ഹുസൈന്‍ എന്ന ഇന്ത്യന്‍ പൗരനെ അനുവദിച്ചില്ലെങ്കില്‍ രോഗം വേറെയാണ്. മതവികാരം വ്രണപ്പെടുത്തി എന്ന ആരോപണങ്ങളോട് ഹുസൈന്‍ എന്ന കലാകാരന്‍ പ്രതികരിച്ച രീതി ആവിഷ്‌കാര സ്വാതന്ത്ര്യത്തിനുമപ്പുറം ഇന്ത്യന്‍ യാഥാര്‍ഥ്യങ്ങളിലേക്ക് തിരിച്ചുപിടിച്ച കണ്ണാടി കൂടിയായിരുന്നു. ക്ഷേത്രങ്ങളിലെ ചുവര്‍ച്ചിത്രങ്ങളും ശില്‍പങ്ങളും നഗ്‌നമേനി പ്രദര്‍ശിപ്പിക്കുകയും, ലിംഗപൂജ നടന്നുവരികയും ചെയ്യുന്ന ഒരു നാട്ടിന്റെ സാംസ്‌കാരികത്തനിമ ഒരു കലാകാരന്റെ സൃഷ്ടിയില്‍ പ്രതിഫലിച്ചു പോയതില്‍ എന്തിത്ര അരിശംകൊള്ളാന്‍. അതില്‍ അഭിമാനിക്കുകയല്ലേ വേണ്ടിയിരുന്നത്. പക്ഷേ, അതല്ല പ്രശ്‌നം. ചിത്രകാരന്റെ പേര്‍ ഹുസൈന്‍ എന്നേടത്താണ് കാര്യത്തിന്റെ കിടപ്പ്. ചിലരുടെ ഓലപ്പാമ്പുകള്‍ കണ്ട് ഭയന്നേടത്ത് ഖത്തര്‍ എന്ന കൊച്ചു ഭൂപ്രദേശം കാണിച്ച ധൈര്യം ഭാവിയിലെങ്കിലും പാഠമാകേണ്ടതാണ്. നാടിനെതിരെ വെട്ടിത്തുറന്ന് യുദ്ധപ്രഖ്യാപനം നടത്തുന്നവരും ആരാധനാലയങ്ങള്‍ തച്ചുതകര്‍ക്കുന്നവരും സസുഖം വാഴുന്ന ഒരു നാട്ടിന്റെ വികൃതമായിക്കൊണ്ടിരിക്കുന്ന മുഖത്തെ ചായം തേച്ച് മിനുക്കാന്‍ മിനക്കെട്ട രാജ്യസ്‌നേഹിയെ ആട്ടിയോടിച്ച പാതകത്തിന്് കാലം മാപ്പുതരില്ല. ഏകാകിയെപ്പോലെ ജീവിച്ച് 95ാം വയസ്സില്‍ വിപ്രവാസിയായി വിടചൊല്ലിയ ഹുസൈന്‍ എന്ന 'ഭാരത രത്‌നം' ഇനി വരകളില്‍ തെളിഞ്ഞുനില്‍ക്കും. മരിക്കാത്ത ഓര്‍മകളായി; കാലങ്ങളോളം.എം.എഫ്. ഹുസൈന്‍
www.keralites.net       |
To subscribe send a mail to Keralites-subscribe@yahoogroups.com.
Send your posts to Keralites@yahoogroups.com.
Send your suggestions to Keralites-owner@yahoogroups.com.
To unsubscribe send a mail to Keralites-unsubscribe@yahoogroups.com.
Homepage: www.keralites.net
