[www.keralites.net] മമ്മൂട്ടിയും ദിലീപും പങ്കെടുക്കും

 

സലിംകുമാറിന് സ്വീകരണം മമ്മൂട്ടിയും ദിലീപും പങ്കെടുക്കും.

കൊച്ചി: 'ആദാമിന്റെ മകന്‍ അബു' എന്ന ചിത്രത്തിലെ അഭിനയമികവിന് ദേശീയ, സംസ്ഥാന അവാര്‍ഡുകള്‍ നേടിയ സലിംകുമാറിനെ മാതൃകലാലയമായ മഹാരാജാസ് കോളേജ് ആദരിക്കുന്നു. മഹാരാജാസ് കോളേജ് ഓള്‍ഡ് സ്റ്റുഡന്‍റ്‌സ് അസോസിയേഷന്റെ ആഭിമുഖ്യത്തില്‍ ജൂണ്‍ 11 ശനിയാഴ്ച മൂന്നിന് സെന്‍റിനറി ഓഡിറ്റോറിയത്തില്‍ മഹാരാജാസിന്റെ ചലച്ചിത്രപ്രതിഭകളുടെ സംഗമമായാണ് സ്വീകരണം സംഘടിപ്പിച്ചിരിക്കുന്നതെന്ന് ഒ.എസ്.എ പ്രസിഡന്‍റും കാര്‍ഷിക സര്‍വകലാശാല വൈസ് ചാന്‍സലറുമായ ഡോ. കെ.ആര്‍. വിശ്വംഭരന്‍, ജനറല്‍ സെക്രട്ടറി സണ്ണി മാത്യു എന്നിവര്‍ പറഞ്ഞു.

മലയാള ചലച്ചിത്ര ലോകത്തിന്റെ മുന്നണിയിലും പിന്നണിയിലും മഹാരാജാസിന്റെ കൈയൊപ്പ് പതിയുന്നത് ആയിരക്കണക്കിന് വരുന്ന പൂര്‍വ വിദ്യാര്‍ഥി സമൂഹം അഭിമാനത്തോടെയാണ് നോക്കിക്കാണുന്നത്. എഴുപതുകളില്‍ കോളേജിന്റെ അഭിനയവേദിയുടെ ചൈതന്യമായിരുന്നു മമ്മൂട്ടിയെങ്കില്‍ തൊണ്ണൂറുകളുടെ സംഭാവനയാണ് ദിലീപും സലിംകുമാറും.

സംവിധാനമടക്കമുള്ള രംഗങ്ങളില്‍ പുതിയൊരു യുഗപ്പിറവി തന്നെയാണ് മഹാരാജാസിന്റെ പ്രതിഭകള്‍ സമ്മാനിച്ചിരിക്കുന്നത്. ഈ പ്രതിഭകളുടെ ഒന്നിച്ചുകൂടലിനുള്ള അവസരമായാണ് സലിംകുമാറിനുള്ള സ്വീകരണത്തെ ഓള്‍ഡ് സ്റ്റുഡന്‍റ്‌സ് അസോസിയേഷന്‍ വിലയിരുത്തുന്നതെന്ന് ഡോ. കെ.ആര്‍. വിശ്വംഭരന്‍ പറഞ്ഞു.

ശനിയാഴ്ച വൈകിട്ട് മൂന്നിന് ബിജു നാരായണനും ടി.എസ്. രാധാകൃഷ്ണജിയും നയിക്കുന്ന ഓള്‍ഡ് ഈസ് ഗോള്‍ഡ് ഗാനമേളയോടെയാണ് സ്വീകരണപരിപാടിക്ക് തുടക്കം. നാല് മണിക്കാണ് സ്വീകരണച്ചടങ്ങ്. മമ്മൂട്ടിയും ദിലീപും ചേര്‍ന്ന് സ്വീകരണം ഉദ്ഘാടനം ചെയ്യും. തിരക്കഥാകൃത്ത് ജോണ്‍ പോള്‍ മുഖ്യപ്രഭാഷണം നടത്തും. പ്രൊഫ. സി.ആര്‍. ഓമനക്കുട്ടന്‍, ബാലചന്ദ്രന്‍ ചുള്ളിക്കാട് എന്നിവര്‍ പ്രസംഗിക്കും.

സംവിധായകരായ സിദ്ധിഖ്, കലാഭവന്‍ അന്‍സാര്‍, അമല്‍ നീരദ്, അന്‍വര്‍ റഷീദ്, ആഷിഖ് അബു, വിനോദ് വിജയന്‍, വിനു ജോസഫ്, ഛായാഗ്രാഹകരായ രാജീവ് രവി, സുരേഷ് കുമാര്‍, സമീര്‍ താഹിര്‍, ചലച്ചിത്ര താരങ്ങളായ ബാബു രാജ്, ടിനി ടോം, രമേശ് കുറുമശ്ശേരി, സാജന്‍ പള്ളുരുത്തി, ജ്യോതിര്‍മയി, സരയു തുടങ്ങിയവര്‍ പങ്കെടുക്കും.

പൂര്‍വ വിദ്യാര്‍ഥികളുടെ പ്രവാസി സംഘടനയായ ഓവര്‍സീസ് റീയൂണിയന്‍ ഓഫ് മഹാരാജാസ് അലുമ്‌നി, 1986-96 കാലഘട്ടത്തിലെ വിദ്യാര്‍ഥി കൂട്ടായ്മ തുടങ്ങിയവരുടെ ഉപഹാരങ്ങള്‍ സലിംകുമാറിന് സമ്മാനിക്കും. സ്വീകരണച്ചടങ്ങിന് ശേഷവും ഓള്‍ഡ് ഈസ് ഗോള്‍ഡ് ഗാനമേള തുടരും. മഹാരാജാസിലെ പൂര്‍വ വിദ്യാര്‍ഥി സമൂഹത്തെ ഒരു വേദിയില്‍ കൊണ്ടുവരികയെന്ന ലക്ഷ്യത്തോടെ ആരംഭിച്ച www.maharajasoldstudents.com വന്‍ വിജയം കൈവരിച്ചതായി ഡോ. കെ.ആര്‍. വിശ്വംഭരന്‍ പറഞ്ഞു. ഒരു ലക്ഷത്തോളം പൂര്‍വ വിദ്യാര്‍ഥികളെ സൈറ്റില്‍ അംഗങ്ങളാക്കുകയാണ് ഓള്‍ഡ് സ്റ്റുഡന്‍റ്‌സ് അസോസിയേഷന്റെ ലക്ഷ്യം.
www.keralites.net

__._,_.___
Recent Activity:
KERALITES - A moderated eGroup exclusively for Keralites...
To subscribe send a mail to Keralites-subscribe@yahoogroups.com.
Send your posts to Keralites@yahoogroups.com.
Send your suggestions to Keralites-owner@yahoogroups.com.

To unsubscribe send a mail to Keralites-unsubscribe@yahoogroups.com.

Homepage: www.keralites.net
.

__,_._,___